Friday, July 09, 2010

世界杯四強賽後感



作為利記fans,由於謝拉特代表的英格蘭晨早出局,四強主要都系要捧有古治同賴恩巴布的荷蘭,同埋費托加沙比的西班牙。大家都好似唔記得巴布有份入選,不過好似一場正選都未踢過姐。

講開又講,利記收收埋咁多國腳,連艾加、史基泰爾在國家隊都扮演重要角色,有乜理由今年聯賽打得咁鬼衰丫?舊年先簽左張新合同,賓佬今年就要執包袱,唉。睇返西班牙的中場,真系令人懷念沙比艾朗素,今年呀盧卡斯利華真系好唔掂也。

其實兩場波:荷蘭對烏拉圭,同埋西班牙對德國,都各有各好睇。第一場入球梅花間竹,完場更富戲劇性。第二場可謂半斤八兩,對手實力相近,打得精彩。

而且對本人黎講,呢兩場波最、最、最、關鍵乃是....90分鐘。打。完。收。工。(Thank God!),因為第二日晨早仲要起身返工。

西班牙一直表現平平,打唔返兩年前歐洲國家杯的水準,主要是費托冇態,其實法比加斯都系麻麻,兩人都帶傷出場,攪到隊波踢踢都唔入。結果上場以柏度換費托,又再回復控球在腳的華麗足球。

德國賽前被捧上天,賽後又被馬後砲:隊友太過年輕、欠經驗,欠硬朗之類,我覺得最為欠缺的,就是公平對待。以我來看,兩隊當日都系5:5波而已。賽後全場控球德國有49%,而西班牙佔51%,相距其實並不太大。

傳球和射球當然是西班牙較多,但君不要忘記德國是打反擊專家,其實上半場臨完場德國中場奧斯爾單刀,明顯地被西國後衛拉莫斯在禁口踢倒,慢鏡看到奧斯爾是被撞低,但當時球證並沒有比十二碼,西班牙逃過一劫。若這罰球成立,德國領先,分分鐘西班牙便重蹈英軍及阿根庭的覆徹。

我並不覺得德國打得差,只是一直比西班牙拑制,其實在落後亦有追平機會。下半場德國亦有一個黃金扳平機會,後備卻奧斯接應隊友短傳,在西班牙的禁區起腳,射正龍門而被卡斯拿斯救出。若湯馬士梅能夠上陣,以他的表現,可能有機會射入改寫賽果。



一場的球賽往往便是由於一些的誤判,一些機會的把握,最後結果被改寫。2002世界杯決賽表現出色的波力克沒法上陣,這次梅拿亦無緣參賽,德國的輸波可謂沒有大賽命,時也命也。

昨晚扭開無線,看了5分鐘世界杯動起來,聽埋一班扮作好有分析能力的馬後砲,真系覺得十分討厭。反不如有線球彩台,那一群口沒遮攔的評述員,比錯貼士便當。眾。食。蕉。來個自我了段,令人看得更加痛快。

5 comments:

程音語 said...

西班牙仲有Reina同Arbeloa, 大家都係好似唔記得佢地有份入選咁...

決賽捧邊隊? 我就理性上捧西班牙但感性上捧荷蘭喇...

Xavier said...

我鐘意西班牙多d,如果西班牙踢到好似對德國咁,我覺得荷蘭應該冇乜機會. 而且荷蘭後防差,雲保美又茅,對巴西那場可以比人剖開中場線直傳比羅賓奴都有...唉.

但系今年我覺得荷蘭夠運,史尼達好有大賽命,直程可以贏完歐冠再贏世界杯都講得通. :)

呢場會系技術對命運之戰 !!

ber said...

"呢場會系技術對命運之戰 !! " 我同意!雖然我人在荷蘭,無論輪輸贏都會支持橙軍 :D

梁巔巔 said...

:)

肥貓 said...

無線的世界杯動起來真是好好笑, 虧佢地諗得咁既idea!

我就覺得cctv既評術好好, 中肯而且好多其他資料性的知識, 令我這個門外漢也看得過癮.

LinkWithin

Related Posts with Thumbnails